Ағымдағы жылдың 15 наурызында жергілікті БАҚ журналистері үшін Бөрлі ауданы бойынша Мемлекеттік кірістер басқармасында брифинг өткізілді. Брифинг барысында 2014 жылға Басқарма қызметінің қорытындысы,  Қазақстан Республикасы аумағынан тыс жердегі мүлікті жария ету, сондай-ақ электронды шот-фактураларды жазып беру жөнінде айтылды.

 Бөрлі ауданы бойынша Мемлекеттік кірістер басқармасы басшысының орынбасары Ермек Алғазыұлы Алғазиевтың айтуынша, өткен жыл қорытындысы бойынша басқармада жалпы 53 393 салық төлеуші тіркеу есебінде тұр, соның ішінде заңды тұлғалар – 1024 (619 шағын кәсіпкерлік субъектілері, 117 өкілділік пен филиалдар және т.б.), жеке тұлғалар – 52369 (3558 дара кәсіпкер, 6 адвокат, 6 нотариус) құрайды.

Басқармамен 2014 жылы дара кәсіпкерлерді тіркеу, ҚҚС төлеушілерін, фискалды жады бар БҚМ, электронды салық төлеушілерді тіркеу есебіне қою, қызметтің жекешелеген түрлерін тіркеу, патент беру, анықтамаларды беру, есепке жатқызу-қайтару, салық есептілігі нысандарын қабылдау бөлігінде 56478 салықтық қызмет көрсетілді.

«2014 жылы мемлекеттің жиынтықталған бюджетіне 585 млрд. теңге (2013 жылмен салыстырғанда өсуі 146% құрайды), ұлттық қорға – 355 млрд.теңге (2013 жылмен салыстырғанда өсуі – 202 %), мемлекеттік бюджетке – 229 млрд.теңге (2013 жылмен салыстырғанда өсуі – 102%) түсімдер қамтамасыз етілді.

Республикалық бюджетке қамтамасыз етілген түсім сомасы 198 млрд.теңгені құрады, 2013 жылмен салыстырғанда  1%-ға төмендеуі байқалады. Оған себеп болған 2013 жылы мұнайға жалпы әлемдік бағасының түсуі. Әрине, бұл бюджетке түсетін КТС салығын төлеушілер, мердігер компанияларының табысына тікелей әсер етті» - деді Е.Алғазиев.

Одан кейін баяндамашы 2014 жылы жергілікті бюджетке 32 млрд.теңге көлемінде түсім түсірілгенін (2013 жылмен салыстырғанда өсуі 123 % құрайтынын) мәлім етті.

01.01.2014 жыл кезеңімен салыстырғанда 01.01.2015 жыл кезеңіне салықтар бойынша бересі сомасы 506 млн.теңгеден 486 млн.теңгеге дейін төмендетілді, яғни 20 млн.теңгені немесе 4 % құрады.

Міндетті зейнетақы жаралары бойынша 2014 жыл басынан 13 млн.теңгеден 5 млн.теңгеге дейін  (8 млн.теңгеге немесе 60%-ға); әлеуметтік аударымдар бойынша бересі 2,1 млн.теңгеден бастап 1,5 млн.теңгеге дейін (31 %-ға) азайды.

Жалпы бюджетке 2 494 млн.теңге көлемінде салықтар есептеліп, 2 12 млн.теңге өндірілді.

Қазақстан Республикасы аумағынан тыс жердегі мүлікті жария ету мәселесі туралы Бөрлі ауданы бойынша Мемлекеттік кірістер басқармасының бас маманы О.С.Шәуенов толық түсінік берді.

«Қазақстан Республикасының азаматтарына, оралмандарға және Қазақстан Республикасында тұруға ықтиярхаты бар адамдарға олардың мүлікті жария етуіне байланысты рақымшылық жасау туралы» Заңның орындалуында, салық органдарымен 2014 жылдың 1 қыркүйегінен бастап 2015 жылдың 31 желтоқсанына дейін ҚР аумағынан тыс жерлерде орналасқан мүлікті жария ету жүргізіліп жатқаны бізге мәлім.

Жария ету - табысты жасыру мақсатында заңды экономикалық айналымнан шығарылған және немесе Қазақстан Республикасының заңнамасына сәйкес ресiмделмеген не тиеcілі емес тұлғаға ресiмделген мүлiкке құқықтарды мемлекеттiң тану рәсiмi.
 Салық органдарында мүлікті жария ету өтініштері қабылдау бойынша комиссиялар құрылды, олар өтінішті қабылдау күнінен бастап 30 күнтізбелік күн ішінде шешім шығаруы тиіс. Шешім қабылданған сәттен бастап мүлік жария етілді деп есептеледі.

ҚР аумағынан тыс жерлерде орналасқан мүлігі бар азаматтар Мемлекеттік кірістер басқармасына келесі құжаттарды ұсынуы тиіс:

 - мүлiктi жария етудi өткiзуге екi дана өтiнiштi;

- жеке басын куәландыратын құжатты;

- Қазақстан Республикасы аумағының шегiнен тыс жерлердегi жылжымайтын мүлiк пен шетелде тіркеу есебінде тұрған заңды тұлғалардағы үлесі бойынша мүлiкке құқық белгiлейтiн құжаттың нотариат куәландырған көшiрмесiн табыс етеді; 
- Қазақстан Республикасы аумағының шегiнен тыс жерлердегi бағалы қағаздарды жария ететiн жария ету субъектілері бағалы қағаздар бойынша құқықтарды есепке алудың тиiстi жүйесiндегi есептiк шоттан үзiндiнi не резидентi бағалы қағаздардың эмитентi болып табылатын мемлекеттiң заңнамасында белгіленген осы бағалы қағаздарға меншiк құқығын растайтын өзге де құжатты табыс етеді;

- мүліктің сатып алу құны немесе бағалау құнын растайтын құжатты. Бұл ретте, мүлік құны шетел валютасында көрсетілген болса, ондай баға Қазақстан Республикасының Ұлттық банкі белгілеген ресми курсы бойынша өтінішті беру күніне ҚР ұлттық валютасына аударылады.

-    Алымның төленгенiн растайтын құжатты;

-    шет тілде ресiмделген құжаттар мемлекеттiк тiлге немесе орыс тiлiне нотариат куәландырған аудармасымен табыс етілуге тиiс.

-     Қазақстан Республикасы аумағының шегiнен тыс жерлердегi мүлікті жария ету үшін алым жария етілетін мүлік құнының он проценті мөлшерінде тұрғылықты жері бойынша мемлекеттік кірістер органына төленеді.

Жаппай декларациялау енгізілген кезде «көлеңкелі» мүліктің бар болуы бұл мүліктің иеленушілері үшін жағымсыз салдарын тигізетіні басқарма мамандарымен ескертілді.

Бөрлі ауданы бойынша Мемлекеттік кірістер басқармасымен күн сайын

9:00-ден 18:00-ге дейін (сенбі-жексенбі күндерінен басқа) № 10 кабинетте жария ету бойынша құжаттар қабылданады.

Электронды шот-фактураларды (ЭШФ) жазып беру мүмкіндігі туралы Бөрлі ауданы бойынша Мемлекеттік кірістер басқармасының бас маманы Г.Ж.Жамболатова атап өтті. Соның ішінде ЭШФ жазып беру ережелері мен оларды қолдану артықшылығы туралы түсіндірілді.

Сондай-ақ алдағы жылға қойылған міндеттер жөнінде сөз қозғалды.

«Келер жыл міндеттеріне тоқталсақ, бірінші кезектегі міндет – бюджеттің барлық деңгейі бойынша қосымша резервтерді ескере отырып түсімдер жоспарын орындау. Тиісінше, салық органдары қызметінің барлық бағыты: камералдық бақылау, салық төлеуден жалтару фактілерін анықтау, салықтық міндеттемелерін барынша азайту, қаражаттың нақты түсуі есебінен бересіні өндіріп алу, міндетті зейнетақы жарналары мен әлеуметтік аударымдар бойынша бересіні азайту, әкімшілік айыппұл берешектерін өндіріп алу жұмыстарын күшейту».-деді Е.А.Алғазиев.

Шағын және орта бизнес субъектілеріне тексерулерді жүргізуге мораторийдің аяқталуына байланысты Басқармамен бизнес субъектілеріне тексерулер жүргізу жоспарлануда. Жоспарға сәйкес жеке тұлғалардың жергілікті салықтар, мүлік салығы, жер, көлік салықтары бойынша берешегін өндіріп алу жұмысы жүргізіледі.

Сонымен қатар Басқарма мамандарымен сыбайлас жемқорлық фактілерін болдырмау бойынша міндеттер ерекше бақылауда тұр.

Құрметті оқырмандар! Электронды шот-фактараларды жазып беру, ҚР аумағынан тыс жерлерде орналасқан мүлікті жария ету мәселелері («Жария ету бойынша 30 сұрақ және жауап») бойынша толық ақпаратты «Панорама Карачаганака» газетінің келесі нөмірінен оқи аласыздар.