Батыс Қазақстан облысының Кәсіпкерлер палатасында Кәсіпкерлердің құқығын қорғау мен жемқорлықпен күрес Кеңестің кезекті отырысында этил спирті мен алкоголь өнімдерін сатуда бизнес субъектілерінің проблемалық мәселелері қаралды.

Кәсіпкерлер атынан сөз алған БҚО өндірушілер ассоциациясының төрайымы А.С.Туркина алкоголь өнімдерін өткізгені үшін бюджетке төленетін жыл сайынғы лицензиялық алымдар сомасының шағын бизнес субъектілері үшін ауыр салмақ салатынын ескеріп, алдағы уақытта лицензиялық алымды төлеуді сауда нысандарының алаңына немесе бизнес субъектілерінің тауар айналымының көлеміне қарап бекітуді ұсынды. Сондай-ақ алымды уақытында төлемегені үшін әкімшілік жауапкершілікті және қате төленген алымды қайтару мен есепке алу жолдарын жеңілдету жөнінде өз ұсыныстарын жеткізді.

Отырысқа қатысқан Батыс Қазақстан облысы бойынша Мемлекеттік кірістер департаментінің мамандары Кеңес мүшелері мен кәсіпкерлерге облыс бойынша лицензиялық алым төлеушілерінің саны мен жалпы түскен түсім туралы ақпарат беріп, жыл сайынғы лицензиялық алымдарды төлеу тәртіптері мен лицензиялық алымды төлеуді жеңілдетуде енгізілген өзгерістермен таныстырды.

Отырыс қорытындысында Кеңес мүшелері облыстық Кәсіпкерлер палатасына лицензиялық алымды төлеу тәртіптерін жеңілдету туралы ұсыныстың жобасын Мемлекеттік кірістер департаментімен бірге дайындап, тиісті заң жобасын дайындаушы органдарға жолдау қажет деп шешті.

                            БҚО бойынша Мемлекеттік кірістер департаменті