Енді банктер салыққа қарыздары толықтай төленген жағдайда кәсіпкерлердің және заңды тұлғалардың банк шоттарын дербес аша алады. Бұл туралы ҚР Қаржы министрлігінің Мемлекеттік кірістер комитеті хабарлады.

Салық төлеуші салық органының салық төлеушінің банк шоттары бойынша шығыс операцияларын тоқтата тұру туралы өкімінде көрсетілген салық берешегінің сомасын өтеген жағдайда, банк мемлекеттік кірістер органынан өкімді кері қайтарып алуды алғанға дейін банк шоттары бойынша шығыс операцияларын дербес жаңартуға құқылы.

Аталған өзгерістер 2022 жылғы 1 қаңтардан бастап күшіне енді.

Бұдан бұрын, 2021 жылғы 1 шілдеден бастап енген өзгерістерге сәйкес, егер салық берешегі 18 мың теңгеден кем болса жеке кәсіпкерлер мен заңды тұлғалардың банктік шоттары жабылмайды. Бұл өзгерістер кәсіпкерлікті қолдауға бағытталған.

Салық заңнамасына (Салық кодексінің 118-бабы) енген өзгерістерге сәйкес заңды тұлғалардың, жеке кәсіпкерлердің және жеке практикамен айналысатын адамдардың банк шоттары бойынша шығыс операциялары салық берешегі 6 АЕК (2022 жылы 18,4 мың теңге) мөлшерінен асып кеткен жағдайда ғана тоқтатыла тұрады.

«Салық және бюджетке төленетін басқа да міндетті төлемдер туралы» Қазақстан Республикасының Кодексіне (Салық кодексі) «Салық және бюджетке төленетін басқа да міндетті төлемдер туралы» Қазақстан Республикасының Кодексін қолданысқа енгізу туралы» Қазақстан Республикасының Заңына және «Салық және бюджетке төленетін басқа да міндетті төлемдер туралы» Қазақстан Республикасының Кодексіне (Салық кодексі) өзгерістер мен толықтырулар енгізу туралы» Қазақстан Республикасының 2021 жылғы 24 маусымдағы Заңымен өзгерістер мен толықтырулар қабылданды» - деп толықтырды МКК-де.